Ekela Kaniaupio-Crozier

J. Ekela Kaniaupio-Crozier
Hawaiian Protocol Facilitator
Kamehameha Schools Maui
270 ʻAʻapueo Parkway
Pukalani, HI 96768
telephone (808) 572-3237
fax (808) 572-7062

Aloha mai kākou!
Mahalo no kou kipa ʻana mai i kaʻu blog.  ʻO au ke Kahu Mālama Loina Hawaiʻi ma nei Kula ʻo Kamehameha.  No Hālawa Uka, Oʻahu mai au.  ʻO Keaunui a me Kaniaupio nā ʻohana o kuʻu poʻe mākua, no laila ʻo ka ʻāina ʻo Hauʻula a me Maunawili ko lāua ʻāina hānau.
Ua puka aku au mai ke Kulanui ʻo Hawaiʻi ma Mānoa me ke kekele ʻōlelo Hawaiʻi a me ka palapala no ke aʻo ʻana aku i nā ʻōlelo ʻē ma ke kula kiʻekiʻe.  No laila ua aʻo akula au i ka ʻōlelo Hawaiʻi ma nā kula likeʻole, e laʻa, Ke Kula ʻo Kana Lui, Ke Kula Mākua ʻo Kaimukī a me Kaiser, Ke Kula ʻo Kamehameha ma Kapālama,  Ke Kulanui ʻo Hawaiʻi ma Mānoa, Leeward a me Maui.  A eia kekahi, ua hoʻokumu au i kekahi mau papahana aʻo ʻōlelo Hawaiʻi a puni ka paeʻāina ʻo Hawaiʻi, ʻo ia hoʻi ʻo Leo Kaiāulu a me Kulāiwi, he polokalamu kīwī nō ia.
ʻO au ka Hope Kahu o ka ʻEkalesia ʻo Kupaianaha ma Wailuku.  ʻO Pōmaikaʻi Kaniaupio-Crozier kaʻu kāne.  He manekia mālama ʻāina ʻo ia no Puʻu Kukui ma Maui nei.  ʻEkolu aʻu keiki aʻu e aloha nui ai. ʻO Keonilei kaʻu hiapo, ʻo Kuanoni kaʻu keiki kāne ho’okahi a ʻo Kaleialoha kaʻu muli loa.  Aia ke kiʻi o Kuanoni a me Kaleialoha ma luna nei.  Eia kekahi, i ʻApelila i hānau ʻia ai kuʻu moʻopuna mua loa, ʻo River-Jordan Kaleohoneokalanakila.  ʻO ia ka mea makamae aloha nui ʻia i kuʻu mau maka.  Hoʻomaikaʻi aku au i Ke Akua no kuʻu ʻohana.
Inā he mau manaʻo paha kou, e hōʻīke wale mai a i ʻole inā he mau nīnau, e nīnau wale mai!
Ke Akua pū me ʻoukou a pau.