Makahiki ʻEkolu – He mele no Kāne
August 19th, 2014 by
kaaarona
He mele no Kāne
He ui, he nīnau
E ui aku ana au iā ʻoe
Aia i hea ka wai a Kāne?
Aia i ka hikina a ka lā
Puka i Haʻehaʻe
Aia i laila ka wai a Kāne.
E ui aku ana au iā ʻoe,
Aia i hea ka wai a Kāne?
Aia i Kaulanaakalā
I ka pae ʻōpua i ke kai
Ea mai ana ma Nīhoa
Ma ka mole mai o Lehua
Aia i laila ka wai a Kāne.
E ui aku ana au iā ʻoe,
Aia i hea ka wai a Kāne?
Aia i ke kuahiwi,
i ke kualono,
i ke awāwa,
i ke kahawai,
Aia i laila ka wai a Kāne.
E ui aku ana au iā ʻoe,
Aia i hea ka wai a Kāne?
Aia i kai, i ka moana,
i ke kualau, i ke ānuenue, i ka pūnohu,
i ka uakoko, i ka ʻālewalewa,
Aia i laila ka wai a Kāne.
E ui aku ana au iā ʻoe,
Aia i hea ka wai a Kāne?
Aia i luna ka wai a Kāne
I ke aouli, i ke ao ʻeleʻele,
I ke ao panopano,
I ke ao pōpolo hua mea a Kāne lā ē,
Aia i laila ka wai a Kāne.
E ui aku ana au iā ʻoe,
Aia i hea ka wai a Kāne?
Aia i lalo, i ka honua
I ka wai hū,
I ka wai kau a Kāne me Kanaloa
He wai puna, he wai e inu
He wai e mana, he wai e ola
E ola nō ʻeā!
Posted in Makahiki ʻEkolu, Papa ʻŌlelo Hawaiʻi | No Comments »